Firma e analizave financiare Bernstein ka rishikuar në mënyrë drastike pritshmëritë e saj për tregun global të kontratave të parashikimit, duke parashikuar tani se vëllimi vjetor i tregtimit mund të arrijë 10 trilionë dollarë deri në vitin 2035. Kjo shifër është rreth 24 herë më e lartë se 410 miliardë dollarët që priten të tregtohen këtë vit, dhe dhjetë herë më e madhe se vlerësimi origjinal që kishte bërë vetë banka për vitin 2030.
Sipas analistëve të udhëhequr nga Gautam Chhugani, vëllimet e tregtimit pritet të rriten me një ritëm vjetor prej rreth 70% deri në 2035. Vetëm brenda tetë muajve të parë të këtij viti, vëllimi total i industrisë ka arritur rreth 300 miliardë dollarë, nga rreth 50 miliardë dollarë që ishte gjatë tërë vitit të kaluar.
Ndryshimi i strukturës së tregut
Nëse në vitin 2025 kontratat sportive përbënin 61% të vëllimit total, Bernstein pret që kjo pjesë të bjerë në 38% deri në 2035. Në të kundërt, kontratat e lidhura me kripton, aksionet dhe mallrat, të grupuara si "asete financiare", parashikohet të kalojnë nga 12% në 49% të tregut, duke u bërë kategoria më e madhe për herë të parë.
Analistët përmendin edhe produkte të reja si tregjet e treguesve të performancës (KPI), ku përdoruesit mund të tregtojnë një metrikë të vetme korporative, si prodhimi apo numri i abonentëve, pa pasur nevojë të blejnë vetë aksionin. Po ashtu, kontratat perpetuale, ato pa afat skadence, po zgjerohen nga kripto drejt mallrave dhe aksioneve individuale.
Kontratat e parashikimit lejojnë përdoruesit të tregtojnë opsione "po" ose "jo" mbi ngjarje të ndryshme, nga vendimet e bankës qendrore amerikane deri te rezultatet financiare të një kompanie. Çdo kontratë shlyhet me 1 dollar nëse ngjarja ndodh dhe me 0 dollarë nëse jo, duke bërë që vetë çmimi të pasqyrojë probabilitetin e ngjarjes.
Rritje e shpejtë e platformave kryesore
Në platformën Kalshi, pjesa e tregtimit të lidhur me kripton është rritur nga më pak se 5% në janar në rreth 20% në gusht. Tregtimi i mallrave në të njëjtën platformë ka kaluar nga më pak se 2 milionë dollarë gjatë gjithë vitit 2025 në rreth 590 milionë dollarë deri tani këtë vit, ku vetëm në gusht janë tregtuar 410 milionë dollarë. Kalshi zotëron sot rreth 60% të vëllimit total të industrisë, krahasuar me 35% një vit më parë.
Në prill, Bernstein kishte parashikuar që tregu do të arrinte një shifër më modeste prej 1 trilion dollarë deri në 2030. Atëherë, banka argumentonte se rritja do të vinte kryesisht nga hyrja e investitorëve institucionalë, jo nga bastet sportive.
Sipas vlerësimeve më të fundit, vetëm asetet financiare si kripto, aksionet dhe mallrat përfaqësojnë sot një treg potencial prej 700 trilionë dollarësh, që pritet të rritet në 900 trilionë deri në 2035. Edhe nëse tregjet e parashikimit kapin vetëm 0.5% të kësaj shume, kjo do të nënkuptonte 4.7 trilionë dollarë në vit vetëm nga kontratat financiare, pa llogaritur fare bastet sportive.
Drejtori ekzekutiv i një platforme tregtimi, Vlad Tenev, ka theksuar këtë javë se kategori si kripto po zënë tashmë një pjesë joproporcionale të tregut, duke shtuar se brenda pak vitesh bastet sportive mund të mbeten në minorancë. Biznesi i kontratave të ngjarjeve i kompanisë së tij ka shënuar një rritje dhjetëfishe të të ardhurave, duke arritur 156 milionë dollarë në tremujorin e dytë të vitit 2026.