Exchange-i BitMEX ka mbyllur zyrtarisht të gjitha operacionet e tij, duke i dhënë fund një procesi likuidimi që zgjati rreth dy muaj. Sipas njoftimit të kompanisë, tregtimi, depozitat dhe hapja e pozicioneve të reja nuk janë më të mundshme, ndërsa përdoruesit ende mund të hyjnë në llogaritë e tyre dhe të tërheqin fondet e mbetura.
Kompania theksoi se fondet e klientëve mbeten të sigurta dhe i nxiti përdoruesit t'i tërheqin sa më shpejt bilancet e tyre. Depozitat e reja nuk regjistrohen më, dhe BitMEX ka paralajmëruar se çdo transfertë drejt adresave të tij të vjetra nuk do të kreditohet.
Përdoruesit që kanë kaluar procesin e verifikimit KYC dhe vazhdojnë të mbajnë fonde në platformë do të përballen tani me një tarifë vjetore prej 1% ose 50 dollarësh, cilado shumë të jetë më e madhe, e cila do të llogaritet çdo muaj. Kompania ka bërë të ditur se kjo tarifë do të rritet me kalimin e kohës, ndërsa po vendos edhe masa shtesë sigurie, si rifreskimin e verifikimeve KYC dhe periudha pritjeje, për shkak të rritjes së tentativave për mashtrim ndaj klientëve që kërkojnë tërheqje më të shpejta.
Nga themelimi te mbyllja
Vendimi për mbylljen u mor në korrik nga pronari i platformës, kompania HDR Global Trading, si rezultat i një rishikimi strategjik të biznesit dhe të gjendjes së përgjithshme të industrisë. Regjistrimet e reja u ndaluan menjëherë, hapja e pozicioneve të reja u bllokua në fund të gushtit, ndërsa pozicionet ekzistuese filluan të mbylleshin me forcë në vazhdim.
Themeluar në vitin 2014, BitMEX njihet si platforma që zbuloi kontratën perpetual swap, një lloj kontrate futures pa datë skadence, e cila lejonte leva tregtimi deri në 100 herë vlerën e investimit fillestar. Kompania e quan këtë produkt si më të tregtuarin në historinë e kriptomonedhave dhe pohon se asnjëherë nuk ka humbur fonde përdoruesish si pasojë e ndonjë sulmi kibernetik.
Historia e platformës ka pasur edhe momente të vështira. Në vitin 2024, BitMEX pranoi fajësinë për shkelje të ligjit të fshehtësisë bankare dhe pagoi 100 milionë dollarë gjobë. Në mars të vitit 2025, presidenti amerikan Donald Trump fali tre nga bashkëthemeluesit e platformës, Arthur Hayes, Ben Delo dhe Samuel Reed.
Njëri prej tyre, Ben Delo, është angazhuar më pas në politikën britanike, duke dhuruar 8 milionë paund këtë vit për partinë Reform UK të Nigel Farage, sipas të dhënave zyrtare të komisionit elektoral. Në njoftimin e mbylljes, BitMEX falënderoi të gjithë ata që kanë tregtuar përgjatë viteve në platformën e tyre.