Cardano Foundation i ka bërë thirrje Bashkimit Evropian që të mos miratojë rregullore të reja e të veçanta për financat e decentralizuara (DeFi) dhe staking-un. Sipas organizatës, ligjet financiare ekzistuese duhet të mjaftojnë për të mbuluar këto aktivitete, duke u bazuar në funksionin dhe riskun që ato paraqesin, jo në teknologjinë përmes së cilës kryhen.
Në një postim të publikuar të mërkurën, fondacioni ka përshkruar përmbajtjen e një dokumenti prej 19 faqesh, të dërguar më 30 shtator te Komisioni Evropian. Në të kërkohet një dallim i qartë mes pjesëmarrjes direkte në rrjete të decentralizuara dhe shërbimeve financiare të ofruara nga ndërmjetës, veçanërisht kur këta të fundit mbajnë ose kontrollojnë asetet e përdoruesve.
"Rregullimi duhet të ndjekë thelbin e aktivitetit, funksionet që kryhen dhe rreziqet që krijohen, jo teknologjinë përmes së cilës zhvillohet ai," shkruan fondacioni në dokumentin e dërguar.
Delegimi i ADA si shembull
Sipas Cardano Foundation, përdoruesit e rrjetit mund të delegojnë tokenët e tyre ADA për të ndihmuar sigurinë e rrjetit pa humbur kontrollin mbi to dhe pa i bllokuar ato. Fondacioni argumenton se një pjesëmarrje e tillë duhet trajtuar ndryshe nga shërbimet e staking-ut që ofrohen nga ndërmjetës të tretë.
Në dokument theksohet gjithashtu nevoja për dallime më të qarta mes Rregullores për Tregjet e Kriptoaseteve (MiCA) dhe ligjeve financiare ekzistuese. Fondacioni paralajmëron se rregulla që mbivendosen dhe interpretime të ndryshme mes shteteve anëtare mund të krijojnë pasiguri për bizneset e kriptomonedhave në Bashkimin Evropian.
Presion edhe nga autoritetet evropiane
Kjo pozicionim vjen në një moment kur rregullatorët evropianë po shqyrtojnë zgjerimin e mbikëqyrjes mbi shërbimet kripto. Në shtator, Autoriteti Evropian i Letrave me Vlerë dhe Tregjeve (ESMA) rekomandoi masa shtesë mbrojtëse për staking, huadhënie dhe huamarrje, si dhe krijimin e një kategorie të re të rregulluar për kompanitë që ofrojnë qasje në protokollet DeFi.
Cardano Foundation ka kërkuar qartësi rregullatore edhe përtej Atlantikut. Më 20 tetor, organizata iu bashkua pesë institucioneve të tjera të blockchain-it në një letër drejtuar Komisionit të Letrave me Vlerë dhe Shkëmbimeve të SHBA-së (SEC), duke kërkuar njohjen formale të mallrave dixhitalë si asete që nuk klasifikohen si letra me vlerë, në kuadër të kuadrit të propozuar rregullator për kriptomonedhat.