Chainlink ka lançuar sot CCIP 2.0, versionin më të ri të infrastrukturës së vet për lëvizjen e vlerave mes blockchain-eve të ndryshme. Kjo teknologji përdoret gjithnjë e më shumë nga banka dhe projekte kripto për të transferuar stablecoin, Bitcoin të mbështjellë (wrapped) dhe fonde të tokenizuara, pa pasur nevojë të ndërtojnë një bridge nga e para.
Blockchain-et nuk komunikojnë natyrshëm me njëri-tjetrin. Ethereum-i, për shembull, nuk e di çfarë ndodh në Solana. Kur një token kalon nga një blockchain në tjetrin, dikush duhet të konfirmojë se transferi ka ndodhur me të vërtetë përpara se ai të shfaqet në zinxhirin tjetër. Ky proces quhet bridge dhe funksionon duke u mbështetur te një verifikues që garanton për transferin.
Rreziku i një verifikuesi të vetëm
Kjo mbështetje ka pasur kosto të larta. Shumë bridge kanë humbur miliarda dollarë ndër vite, zakonisht sepse mbështeteshin te një pikë e vetme dështimi: një verifikues i vetëm, që mjafton të mashtrohet për të komprometuar gjithçka.
Zgjidhja që sjell CCIP 2.0 quhet Cross-Chain Verifier (CCV). Tani institucionet mund të vendosin verifikuesin e tyre, si një kontroll shtesë përpara se transferi të konfirmohet, ose ta marrin me qira nga kompani si Infosys apo Nethermind. Për këtë janë përgatitur edhe pako gati për përdorim në Amazon Web Services dhe Google Cloud.
Në themel, Chainlink vazhdon të mbajë kontrollin e tij të parazgjedhur: një komitet prej 16 operatorësh nyjesh të pavarur, që duhet të bien dakord për vlefshmërinë e çdo transferi. Kjo pjesë mbetet e pandryshuar.
Çka ka ndryshuar është më e heshtur. Risk Management Network, një grup i veçantë nyjesh që dikur rikontrollonte punën e komitetit kryesor, tani ka rol më të vogël. Sipas dokumentacionit të kompanisë, funksioni i tij automatik jashtë zinxhirit nuk është më aktiv në shpërndarjet aktuale të CCIP-it, por pritet të ofrohet si shtresë opsionale verifikimi në versionet e ardhshme. Kontrata në zinxhir mbetet vetëm si mekanizëm rezervë për raste urgjence, ndërsa kontrolli shtesë i pavarur mund të vijë tani nga CCV-të opsionalë.
Konteksti pas sulmit ndaj Kelp DAO
Kjo nismë vjen disa muaj pas një sulmi masiv. Në prill, hacker të lidhur me grupin Lazarus të Koresë së Veriut vodhën rreth 292 milionë dollarë nga Kelp DAO, një protokoll që lejonte përdoruesit të vendosnin ETH në staking dhe ta lëvizonin token-in mes blockchain-eve. Bridge-i i Kelp funksiononte mbi LayerZero, me një konfigurim që përdorte vetëm një verifikues, diçka që vetë LayerZero e ka quajtur më pas gabim dhe ka ndaluar ta mbështesë për shpërndarje të reja.
Kelp ka thënë se ekipi i LayerZero e kishte miratuar atë konfigurim dhe kurrë nuk e kishte sinjalizuar si të rrezikshëm. LayerZero e ka kundërshtuar këtë version, duke thënë se konfigurimi shkonte kundër rekomandimeve të veta. Pavarësisht kush ka të drejtë, institucionet reaguan shpejt: vetë Kelp kaloi te Chainlink, po ashtu edhe Kraken, që zhvendosi token-in e vet të Bitcoin-it të mbështjellë, dhe Lombard Finance, që transferoi mbi 1 miliard dollarë në asete të lidhura me Bitcoin.
Mesazhi kryesor i Chainlink mbetet se ai është bridge-i që nuk është hackuar ende. CCIP 2.0 u jep institucioneve po atë fleksibilitet që i solli probleme LayerZero-s, por me ndryshimin që komiteti i 16 operatorëve të Chainlink vazhdon të kontrollojë çdo transfer si parazgjedhje.
"Bridge-t e vjetra kanë humbur miliarda për shkak të infrastrukturës së pasigurt, ndërsa ndërtimet e brendshme janë të ngadalta e të shtrenjta, dhe rrjetet private të institucioneve nuk mund të fitojnë besimin e partnerëve të tyre," ka deklaruar Johann Eid, drejtor i biznesit në Chainlink Labs, gjatë lançimit.
Sipas të dhënave të vetë kompanisë, CCIP siguron aktualisht mbi 84 miliardë dollarë vlerë të transferuar mes blockchain-eve. Kompania numëron 18 partnerë të lançimit, por deklaratat e tyre janë ende të kujdesshme: Fidelity thotë se përditësimi "ka potencial të mbështesë" shpërndarje më të gjerë, ndërsa Further Asset Management thotë vetëm se "synon të bashkëpunojë". Vetëm pak orë pas nisjes, shpërndarjet e konfirmuara e në funksionim me verifikuesit e rinj mbeten ende të pakta.