JPM Coin kalon në infrastrukturë publike
JPMorgan Chase ka zgjeruar përdorimin e JPM Coin duke e vendosur tani edhe mbi blockchain-in e Ethereum-it. Kjo lëvizje u jep klientëve më të mëdhenj të bankës mundësinë të transferojnë dollarë në çast, qoftë të dielën në mbrëmje apo të martën në mëngjes.
Transfertat klasike bankare funksionojnë vetëm gjatë orarit zyrtar dhe shpesh kërkojnë ditë të tëra për t'u finalizuar. Pikërisht ky problem e shtyu JPMorgan drejt eksperimenteve me teknologjinë blockchain, me synimin për ta ulur këtë kohë pritjeje në vetëm disa sekonda.
JPM Coin nuk është stablecoin në kuptimin klasik, por një "deposit token" - çdo njësi e tij përfaqëson një dollar që ndodhet realisht në një llogari të JPMorgan. Sipas vetë bankës, klientët mund ta shkëmbejnë në çdo moment për dollarë të vërtetë, pa asnjë periudhë bllokimi. Kjo e dallon nga stablecoin-et tradicionale, të cilat mbështeten nga rezerva të mbajtura nga kompani private të treta.
Vlen të theksohet se vetëm palë të miratuara paraprakisht nga banka mund ta mbajnë këtë token - pra nuk bëhet fjalë për një monedhë që mund të blihet lirisht në ndonjë exchange.
Ekspansion i mëtejshëm drejt tregjeve financiare
Para se të vinte në Ethereum, JPM Coin ishte lançuar fillimisht në Base, një rrjet më i shpejtë dhe me kosto më të ulëta i ndërtuar mbi Ethereum. Tashmë mbajtësit e token-it mund ta lëvizin atë lirshëm mes të dyja rrjeteve.
Banka ka paralajmëruar gjithashtu se do ta sjellë JPM Coin edhe në Canton Network, një blockchain i fokusuar te privatësia për tregjet financiare. Përveç kësaj, JPMorgan ka emetuar dy fonde të tokenizuara të tregut monetar mbi Ethereum, instrumente që mbajnë borxh afatshkurtër të përfaqësuar në formë tokenësh.
Drejtuesja globale e njësisë Kinexys Labs pranë JPMorgan ka theksuar se rreth 50 miliardë dollarë qarkullojnë aktualisht në aplikacione mbi Ethereum, sipas të dhënave të DefiLlama. Sipas saj, ky është viti i konvergjencës më të madhe deri më tani mes Wall Street-it dhe industrisë kripto.
Pritet që firmat kripto ta përdorin token-in kryesisht për pagesa, ndërsa institucionet financiare do ta shfrytëzojnë për të shlyer transaksione me asete të tokenizuara ose për të vendosur kolateral në marrëveshje të ndryshme.
Njësia Kinexys ka përpunuar deri tani mbi 4 trilionë dollarë në transaksione kumulative, me një mesatare prej rreth 7 miliardë dollarësh në ditë - shifër që krahasohet me afro 12 trilionë dollarë në ditë që lëviz gjithë rrjeti i pagesave të JPMorgan. Banka, së bashku me Citigroup dhe institucione të tjera të mëdha, planifikon të lançojë një rrjet të përbashkët depozitash të tokenizuara, funksional 24 orë në ditë, që nga fillimi i vitit 2027.