Samuel Tunick, 30 vjeç, muzikant dhe student i doktoraturës në gjeografi pranë Georgia State University, është akuzuar zyrtarisht për pengim të drejtësisë pasi telefoni i tij u fshi automatikisht gjatë një kontrolli në aeroport. Ngjarja ndodhi në janar të vitit 2025, kur oficerë të doganave e ndaluan në Aeroportin Ndërkombëtar Hartsfield-Jackson të Atlantës, duke kthyer nga Republika Dominikane.
Tunick përdor GrapheneOS, një version i sistemit operativ Android të fokusuar tek privatësia, i instaluar në një telefon Pixel. Kur iu kërkua telefoni, ai dha një kod aksesi që aktivizoi funksionin e ashtuquajtur "duress password" — një veçori që fshin automatikisht të dhënat e pajisjes në raste emergjence. Ky veprim u konsiderua nga prokurorët si përpjekje për të penguar një hetim ligjor.
Rasti lidhet me monitorimin e aktivistëve
Gjatë procesit gjyqësor doli në pah se autoritetet e kishin vendosur Tunick në një listë vëzhgimi. Ai i tha gazetës The New York Times se ishte "i habitur dhe i shqetësuar" nga ky fakt, por e vendosi rastin e tij në kontekst me dhjetëra protestues të lëvizjes "Stop Cop City" dhe pjesëmarrës festivalesh muzikore që janë akuzuar për terrorizëm të brendshëm në shtetin e Georgia-s.
Ai e lidhi çështjen e tij me një memorandum presidencial të shpallur në shtator të vitit të kaluar, i cili zgjeroi përkufizimin ligjor të terrorizmit të brendshëm. Sipas tij, ky akt përbën "një sulm të drejtpërdrejtë ndaj lirisë së fjalës dhe të drejtës për t'u mbledhur lirshëm", të mbrojtura nga kushtetuta amerikane.
"Qeveria nuk i zotëron të dhënat tona"
Tunick pohoi se e instaloi GrapheneOS thjesht si parim privatësie, i vetëdijshëm se aktivistët monitorohen intensivisht nga autoritetet. Ai u shpreh se ideja që dikush mund të kërkojë "informacione kompromentuese" mbi jetën e tij personale, pas kësaj ndjekjeje penale, i duket shqetësuese.
Akuza që i është ngritur mund të sjellë deri në pesë vjet burg. Tunick ka dorëzuar pasaportën dhe tani i duhet miratim gjyqësor për të lëvizur jashtë juridiksionit federal të Georgia-s veriore, gjë që ka ndikuar edhe në aktivitetin e tij si muzikant.
Prokurori amerikan përgjegjës për çështjen ka deklaruar se çdo person që shkatërron të dhëna për të penguar një kontroll ligjor duhet të presë pasoja ligjore. Nga ana tjetër, doganat amerikane thanë se kanë të drejtë të kontrollojnë pajisjet e udhëtarëve pavarësisht shtetësisë, por se vitin e kaluar kanë ekzaminuar më pak se 0.01% të pajisjeve të udhëtarëve që hynin në vend.
Tunick e ka mohuar fajësinë, ndërsa zhvilluesit e GrapheneOS kanë theksuar se funksioni i fshirjes së emergjencës është plotësisht ligjor dhe i mbrojtur nga kushtetuta. Vendimi mbi kërkesën e tij për të përjashtuar provat nga gjykimi pritet të merret jo më herët se fundi i muajit tetor.