Departamenti i Sigurisë së Brendshme i Shteteve të Bashkuara u ka kërkuar agjencive civile qeveritare të fshijnë menjëherë DeepSeek, chatbot-in më të njohur të inteligjencës artificiale me origjinë kineze, nga sistemet e tyre kompjuterike. Urdhri përfshin edhe ndalimin e blerjes së çdo shërbimi të jashtëm që bazohet mbi modelin e DeepSeek.
Sipas autoriteteve, përdorimi i këtyre modeleve paraqet disa lloje rreziqesh njëkohësisht. Ato paralajmërojnë se të dhëna të ndjeshme mund të kalojnë në duart e Republikës Popullore të Kinës, nëse punonjës apo kontraktorë qeveritarë i përdorin këto mjete, duke krijuar mundësi për nxjerrjen e informacioneve të vlefshme rreth shtetasve apo institucioneve amerikane.
DeepSeek është një model me kod të hapur që mund të funksionojë lokalisht ose të hostohet nga çdo ofrues, jo domosdoshmërisht me bazë në Kinë. Platforma Perplexity, për shembull, e operon modelin në serverë të vendosur në Shtetet e Bashkuara. Megjithatë, vetë zhvilluesit e DeepSeek mbajnë një version në serverë kinezë për ata që përdorin drejtpërdrejt shërbimin zyrtar.
Masa që shtrihet më gjerë
Ndalimi nuk prek vetëm aplikacionin origjinal të DeepSeek, por edhe çdo shërbim të palëve të treta të ndërtuar mbi këtë model. Një memorandum i muajit korrik, bërë publik tani, kishte kërkuar tashmë nga agjencitë monitorimin e trafikut hyrës e dalës në faqet zyrtare për rreziqe të lidhura me DeepSeek.
Departamenti i Tregtisë dhe Marina e Shteteve të Bashkuara kishin ndaluar më parë përdorimin e DeepSeek në pajisjet qeveritare, ndërsa disa shtete amerikane kanë marrë masa të ngjashme. Ambasada kineze në Uashington nuk ka dhënë ende ndonjë koment zyrtar për vendimin.
DeepSeek, një startup me origjinë nga Hangzhou, u bë i njohur botërisht në janar të vitit 2025, kur modeli i tij me kod të hapur, zhvilluar me më pak se pesë milionë dollarë, shkaktoi rënie të ndjeshme të aksioneve të Nvidia-s dhe fshiu qindra miliarda dollarë vlerë nga tregu i teknologjisë amerikane brenda një dite të vetme.
Muaj më vonë, autoriteti italian për mbrojtjen e të dhënave urdhëroi bllokimin e chatbot-it, duke vlerësuar si të pamjaftueshme përgjigjet e kompanisë ndaj pyetjeve mbi privatësinë. Një komision i Kongresit amerikan ka pretenduar gjithashtu se DeepSeek dërgon fshehurazi të dhëna të përdoruesve amerikanë drejt qeverisë kineze, si dhe se kompania mund të ketë përdorur çipe të Nvidia-s të kufizuara nga rregullat e eksportit të SHBA-së.
Pavarësisht presionit, DeepSeek ka vazhduar zhvillimin e produkteve të reja, duke publikuar këtë javë një version të përditësuar të modelit të tij më të fundit, me synim efikasitetin dhe cilësi më të lartë. Vendimi vjen në kuadër të një fushate më të gjerë federale kundër teknologjisë kineze, ndërsa Komisioni Federal i Komunikimeve pritet të votojë së shpejti për ndalimin e laboratorëve kinezë nga testimi i pajisjeve elektronike për tregun amerikan.