Standard Chartered njoftoi hapjen e një shërbimi të ri që u mundëson klientëve të pasur në Emiratet e Bashkuara Arabe të blejnë Bitcoin direkt përmes llogarive të tyre bankare. Banka theksoi se ky është shërbimi i parë i këtij lloji i ofruar nga një institucion bankar ndërkombëtar në vend.
Lançimi vjen vetëm një muaj pasi banka kishte prezantuar një shërbim të ngjashëm tregtimi Bitcoin për klientët institucionalë në të njëjtin treg. Standard Chartered ishte gjithashtu ndër bankat e para globale që hapën një njësi tregtimi për Bitcoin dhe kriptomonedha të tjera në Londër, në vitin 2025.
Si funksionon shërbimi
Sipas bankës, klientët nuk do të kenë nevojë për aplikacione apo wallet-e të palëve të treta për të blerë Bitcoin. Standard Chartered do të menaxhojë vetë ruajtjen dhe shlyerjen e transaksioneve nëpërmjet një modeli të mbyllur, duke reduktuar rrezikun që vjen nga përdorimi i wallet-eve të jashtme.
Samir Subberwal, drejtues global i zgjidhjeve të pasurisë tek Standard Chartered, deklaroi se interesi i klientëve për asetet digjitale po rritet vazhdimisht dhe se ky hap shënon një moment të rëndësishëm për integrimin e tyre në ofertën kryesore të pasurisë së bankës. Ai shtoi se klientët po kërkojnë jo vetëm qasje te këto asete, por edhe siguri dhe besueshmëri që vjen nga investimi përmes një institucioni të rregulluar.
Rola Abu Manneh, drejtuesja ekzekutive e bankës për Emiratet, Lindjen e Mesme dhe Pakistanin, u shpreh se kompania është krenare që është banka e parë ndërkombëtare në vend që ofron tregtim kriptomonedhash.
Zgjerim global i shërbimeve kripto
Standard Chartered po zgjeron ofertën e saj të lidhur me kriptomonedhat në nivel global. Më herët këtë muaj, banka njoftoi plane për të ofruar shërbime ruajtjeje kripto për klientë institucionalë edhe në Singapor.
Aktualisht, banka e ofron këtë shërbim në Emiratet e Bashkuara Arabe, Luksemburg dhe Hong Kong. Në të njëjtën kohë, një numër gjithnjë e më i madh bankash në Shtetet e Bashkuara dhe Evropë po fillojnë të ofrojnë shërbime të lidhura me kriptomonedhat, qoftë përmes ruajtjes së aseteve për institucione, qoftë përmes tregtimit direkt në aplikacionet e tyre kryesore.