Kompania kineze StepFun, e mbështetur nga Tencent, ka prezantuar telefonin STEPX Neo, i cili e integron AI agent-in direkt në sistemin operativ, në vend që ta vendosë atë si një aplikacion të veçantë. Porositë paraprake kanë nisur në çmimin 3,999 yuan, rreth 560 dollarë, ndërsa shitja e parë zyrtare është planifikuar për 16 tetor.
Në vend që përdoruesi të hapë një aplikacion për transport, të shkruajë adresën dhe të zgjedhë makinën, ai thjesht i thotë telefonit se ku dëshiron të shkojë. Agjenti i AI-së - një program softuerik që merr një qëllim dhe e ekzekuton vetë hap pas hapi - kujdeset për pjesën tjetër të procesit.
StepFun ka deklaruar gjatë lançimit se në epokën e agentëve, AI nuk është më një shtesë e thjeshtë e smartphone-it, por vetë produkti kryesor. Kompania e kishte prezantuar për herë të parë këtë agent, sistemin operativ dhe brand-in STEPX në korrik, pa dhënë ende çmim apo datë shitjeje konkrete.
Si funksionon sistemi operativ i ri
Ndryshe nga Siri apo Gemini, të cilët funksionojnë si asistentë brenda iOS dhe Android, StepFun thotë se sistemi i tyre, i quajtur Step AOS 1.0, është ndërtuar nga e para posaçërisht për agentë AI. Ai përfshin memorie afatgjatë, planifikim detyrash dhe kontrolle sigurie të integruara në vetë bazën e sistemit, duke kombinuar elemente nga Android, Linux dhe sisteme operative në kohë reale.
Step AOS i ndan funksionet e telefonit - si mesazhet, aplikacionet, file-t dhe cilësimet - në blloqe të vogla që agjenti mund t'i thërrasë direkt, duke përdorur protokollin Model Context Protocol (MCP), një standard i përbashkët që lejon programet e AI-së të lidhen me softuer tjetër. Përdoruesit kanë dy mënyra aksesi: grid-in tradicional të aplikacioneve dhe një hapësirë të veçantë për agjentin.
Agjenti, i quajtur Amoo, mban dy lloje memorie - njërën për faktet, zakonet dhe preferencat e përdoruesit, dhe tjetrën për atë që ka mësuar rreth kryerjes së detyrave. Komandat e thjeshta, si vendosja e një alarmi, ekzekutohen nga një model i vogël brenda vetë telefonit, disa herë edhe pa lidhje interneti, ndërsa kërkesat më komplekse që prekin disa aplikacione njëherësh dërgohen te një model më i madh në cloud. Një ekran i dytë MiniLED në pjesën e pasme të telefonit shfaq në kohë reale se çfarë po bën Amoo.
Bashkëpunime dhe modelet gjuhësore
Rreth 100 kompani dhe produkte, përfshirë Alipay, Tencent, Ctrip, Didi dhe Meituan, janë bashkuar me platformën Amoo. Pagesat, rezervimet e udhëtimeve dhe krijimi i përmbajtjes vazhdojnë të kryhen nga vetë platformat përkatëse, çka përbën alternativën e StepFun ndaj metodës së leximit të ekranit dhe klikimeve të simuluara që përdor Doubao.
StepFun, themeluar në vitin 2023 nga ish-nënkryetari i Microsoft, Jiang Daxin, zhvillon modelin e vet të madh gjuhësor (LLM), teknologjia që qëndron pas sistemeve si ChatGPT. Modeli i tyre kryesor, Step 5 Preview, u prezantua në shtator me 600 miliardë parametra, nga të cilët 27 miliardë janë aktivë në çdo moment përdorimi. Ky model mund të përpunojë deri në 1 milion token njëherësh, ndërsa versioni më i vogël, Step 3.5 Flash, i lançuar më herët këtë vit, është open-source nën licencën Apache 2.0.
Çmimi fillestar prej 3,999 yuan përfshin edhe 12 muaj abonim në planin STEPX Token, i cili ofron 100 miliardë token në muaj. StepFun ende nuk ka bërë të ditur sa do të kushtojë shërbimi i AI-së pas vitit të parë.